هاذا البوست هو نتاج تجربة شخصية مع البريد الاردني، وانا حابب افيد الناس بمعلومات تعلمتها بطلوع الروح.
اذا انت من الناس الي بشتروا اشياء اون لاين - عالأنترنت، فأكيد مريت بتجربة صعبة وانت بتحاول توصل وتعرف وين صارت الاغراض الي اشتريتها، وانا بهاد البوست رح احاول اعطيك مفاتيح الحلول لتجربة سهلة مع البريد الاردني.
اول اشي، اذا انت (online shopper) بس لسا ما اشتريت من الانترنت، تأكد تحط معلوماتك كاملة على الباكيج او الرسالة، مع رقم التلفون والاسم.
من الاخر، احنا مش بأمريكا، لاتفكر انو اذا حطيت عنوان البيت الشباب رح يجيبولك الرسالة او الباكيج لعتبة الدار، اذا عندك رقم صندوق بريد، الفرص انو البريد يوصلك بتكون اكبر، وبعينك الله غلّب حالك و اوصل مركز بريدك وجيب البضاعة.
في فرق بين البريد المسجل والعادي، المسجل الو tracking number والعادي بدون هوية، على الاغلب، المسجل هو الي رح يجيك فيه الطرد او الرسالة لأنو اله tracking number، اذا اشتريت اشي اونلاين وماكان في tracking number لازم تطلب الرقم من البائع عشان تعرف وين صار الطرد او الرسالة لأنو اذا وصلت الرسالة او الطرد على الاردن وماحد طالب فيها بترد بترجع على البلد الام بعد حوالي الشهر او اقل.
عشان تعرف شوصار بالطرد تبعك، اعمل تتبع هون
اذا كتير مستتقل انك تروح على البريد عشان تجيب الطرد او الرسالة، لازم تعرف شغلة، البريد بوصلك على البيت اذا كان رقم التتبع tracking number الخاص بالطرد - ببدأ بحرف (E) اما اذا كان ببدأ بحرف (R) فا بحب اقلك انسى موضوع انو موظفين البريد رح يوصلولك اي اشي على البيت - هاي معلومة من البريد نفسه.
اذا كنت اشتريت اشي من الانترنت ورقم التتبع tracking number بقلك انو الطرد او الرسالة وصل الاردن، فلازم تلحق حالك وتحكي مع مركز البريد وتشوف لساتو عندهم ولا لأ، طبعا في حالة انك ماعندك صندوق بريد وانت حطيت عنوان البيت ولسا ما وصلك وشكلو مش ناوي يوصل فهو على الاغلب بكون في مركز البريد الرئيسي في منطقة المقابلين، وبالطريقة التالية بتقدر توصل للطرد او الرسالة تبعتك:
- احكي مع 064293000 وادخل الرقم الفرعي 4247 (ممكن مايرد من اول مرة لكن ضلك حاول)
- رح يرد عليك شخص لطيف، اشرحلو الموضوع واعطيه ال tracking number
- اطلب منه يوصلك الطرد على صندوق بريدك
- اذا ماعندك صندوق شوف ايش اقرب مركز بريد لبيتك واطلب التوصيل إله.
- اسأله متى رح يكون الطرد في المركز المذكور عشان تروح تستلمه.
- قله (يعطيك الف عافيه) وسكر الخط.
لقيت المعلومات مفيدة؟ اترك تعليق او اعمل شير.
